هذا الذي ذاكا

--------------------------------------------------------------------------------


خميس نصر
تركيبة فتّاكة
من شلة عكّاكة
بتقوللي إيّاكا
هذا الذي ذاكا
بلاش تفكّرنا
إن احنا خنشرنا
عاوز تغيّرنا
اقفل يا واد فاكا

ليه بس بتعاند
وتقول كلام جامد
ولمجدنا جاحد
وتاعبنا ويّاكا

بتغني أغنيّة
عن كبش وضحية
وخيانة زوجية
راجل بقى ولية
ونيتك هيّة
هذا الذي ذاكا

بيقول كلام فارغ
ويلّف وتراوغ
حتى الرموش صابغ
ما تقولها بشياكة


عاملها سبّوبة
والقلب كركوبة
ميّت متين نوبة
موش ناوي عالتوبة
هذا الذي ذاكا

أقرع ويتمخطر
وعلينا يتشطر
بالخلق يستهتر
ويصول بسلاّكة

الناس أكيد فاهمة
إنه غبي ولخمة
وانه ملوش لازمة
هذا الذي ذاكا

ما بحبّش التجريح
ولا ماشي بالتصريح
عاوزني أقول بفصيح
هذا الذي ذاكا

كل البشر فاهمين
لو إنهم ساكتين
بس اللي مخه تخين
هذا الذي ذاكا