مسامحينك

شعر لخميس نصر


يا نني العين يا محروسة

خدي بوسة على جبينك

عشانك منداسين دوسة

يا ريتنا بس عاجبينك

وآدي قلوبنا مفروسة

ورح نمسح دموع عينك

بتنخر في العضام سوسة

بينشرها عدوينك

ما تصحي لشلة موكوسة

طابور خامس وبيهينك

بتزرع في الغيطان كوسة

وبالمجان وبايعينك

بحبك محتاسين حوسة

عشان احنا اللي عارفينك

بتلعب شلة مهووسة

في ودنك عنّا حاجبينك

وناسك اللي مهروسة

حدادي الأرض خاطفينك

من الأحلام وموروثة

وموش عارفة اللي ظالمينك

وناسية إن اننا ولدك

وأنا اللي زبيبة في جبينك

وما قصّرت في ودّك

وفاكرة اللي خادعينك

وبتباركي اللي بيهدّك

نسيتي انه أخد عينك

على رجليك بيمدّك

وشركاته اللي بالعينك

أنا باقي على ودّك

باخضّر في فدادينك

أنا ناوي أقيم حدّك

وأصبح لك فدا دينك

وأبقى للطوفان سدك

هاصونك من ملاعينك

ومين غيري على قدّك؟

ومين غيري ملا عينك؟

مانيش سايب على خدّك

نزيف الدمع من عينك

أنا حسابك أنا عدّك

على هجرك مسامحينك

أنا هزارك أنا جدّك

أنا بسمة على جبينك

أنا سطورك وكراسك

أنا وردة بساتينك

أنا سلمك أنا رصاصك

أنا قمحك أنا تينك

أنا منّك بقية ناسك

أنا موش م اللي سايبينك

أنا هافرم وضيع داسك

أنا صفرك ملايينك

أنا يا حبيبتي أنفاسك

أنا دمّك شرايينك

ده إمتى ترتبي راسك

ويتحرر مساجينك؟

وإمتى تشوفي حرّاسك؟

وتدّيهم عناوينك

ونفسي تحضّري فاسك

عشان تخضّر وتزينك

وليه سبتي الوضيع باسك؟

وهمّة دول ملاوعينك

أنا ماشي في نبراسك

وبامسح لك دموع عينك

وعايش كل إحساسك

وهافضل من محبينك

واعالج لك في وسواسك

ومن مجموعة خانقينك

يا نني العين يا محروسة

متين بوسة على جبينك

أنا مجنون يا محبوسة

وعاقل من مجانينك

وتايه بين إيدين أمّه

وباصرخ في الفضا فينك؟

ونفسه تشيله وتضمّه

وبادعي ربنا يعينك

وبادعي ربنا يعينك